Total de siento deci-nueve cyclista el ya participa na Bicicleta divertida dos mil veinte dos (“Fun Bike 2022”) que ya inicia el Western Mindanao Command (Westmincom) del Sabado aqui na ciudad de Zamboanga.
El Bicicleta divertida ta sirvi parte del maga actividades del Westmincom en coneccion con el celebracion de aka deci-seies anniversary del mando que ay celebra na Agosto veinte ocho.
Con el actividad del Sabado, que ya organiza para ase mafuersa el relasyion entre maga personas de uniforme, ya participa maga cyclista del fuersa militar base aqui na ciudad de Zamboanga y personajes del pulisiya y guardia costal.
El ruta del actividad que tiene el distancia de treynta’y uno punto cuatro kilometro estaba na quartel del Westmincom na Campo Navarro para na Barangay La Paz, pasando na camino de Maasin y bira otravez na Campo Navarro.
Maga alto oficiales del fuersa militar y pulisiya quien ya participa con el actividad del Sabado ta incluwi canda Heneral de Brigada Arturo Rojas, deputado comandante del Westmincom para el operacion de defensa externa; Heneral de Brigada Dennis Estrella, comandante del fuersa aerea (Air Force) na Weste Mindanao; Coronel Randolf Rojas, comandante del Task Force Zamboanga; y si Coronel William Gadayan del mando del pulisya rehyonal.
El Tiniente Heneral Alfredo Rosario, Jr., comandante del Westmincom, ya expresa su gratitud con el maga organizadores y participantes quein ya ase todo’l manera para el buen exito del actividad.
Asegun con Rosario cay el actividad es un buen manera de descanso desde’l actividades rutinarias del maga personajes de uniforme. (Bong Garcia, Jr., photo courtesy of Western Mindanao Command)
