Ta alcansa na 12,500 similla de arbol ingena el ya siembra na forestal del sitio Brea, barangay de Lumayang este dia en celebracion del Dia de Arbol o Arbor Day na Ciudad de Zamboanga.
El Alcalde John Dalipe, junto con el Vice Alcalde Josephine Pareja y Congresista Mannix Dalipe na representacion di Jojo Dalipe del Distrito 2 el ya encabeza con el diferente agencia local y nacional durante el siembrada de arbol o tree planting con el objeto para proteje y preserva el media ambiente para el bien del generacion futuro.
Ya rindi su gratitud el Alcalde con todo maga agencia que ya participa na tree planting activity mientras ya apela le con todo residente del Ciudad para hace di ila obligacion y responsibilidad para siembra, protoje y preserva arbol.
Na facilitacion del Office of the City Environment and Natural Resources (OCENR), el actividad ya adopta el tema: “Trees are Terrific…in all Shapes and Sizes.”
Total de sinco (5) hectaria de protected land na Lumayang el ya siembra con 12,500 de pono’y narra, nato y palo maria.
Presente tambien na tree planting activity el Consejal Jerome Santos y Fred Atilano, OCENR chief Engr. Rey Gonzales y mucho pa otro.
El celebracion de Arbor Day es un actividad nacional. Sin embargo el Govierno Local ya aprova el Ordinanza 281 del anios pasao que ta designa con el Junio 25 cada anio como Dia de Arbol na Ciudad de Zamboanga.
(Source: City Government of Zamboanga Facebook Page, photo courtesy of Kathy Wee Sit)
