Mga otoridad ya puede confisca setenta gramos del shabu que tiene el valor de cuatro sientos curenta’y dos mil de pesos alli na aeropuerto del ciudad.
Asegun con Jury Rocamora, hefe del Philippine Drug Enforcement Agency (PDEA) aqui na ciudad, cay con el setenta gramos de shabu compuesto de catorse pakete ya confisca mga alas dos veinte sinco ayer tarde na aeropuerto.
Si Rocamora ya habla cay el mga pakete del shabu ya pone adentro de un interior de rueda y ya pone na un hurgesa trak-trak para manda aparese cay un hurgesa el laman del imbiao carga.
Pero ya duda el technician cuando ya ase pasa con el carga na un x-ray inspection machine y ya lleba le na atencion del pulisiya na aeropuerto quien ya coordina con el PDEA.
Ya decidi mga otoridad abre con el cahon del carga y alla ya descubri sila cay ta contene este shabu despues que ya manda sila inspecciona con el K9 units del coast guard y PDEA.
Asegun con Rocamora cay el quien ya imbia con el carga para na ciudad de Puerto Princesa, Palawan, un residente de Barangay San Roque, este ciudad.
Si Rocamora ya habla cay ta verifica sila ahora si verdadero ba el nombre del persona quien ya imbia y tambien quien ay recivi con el carga alla na Palawan. (Bong Garcia)