Dos alto ranggo myembros del New People’s Army ya rindi anoche na quartel de 97th Infantry Battalion (IB) alla na Barangay Del Pilar, Piñan, Zamboanga del Norte.
Si Tiniente Coronel Nolasco Coderos, comandante del 97IB, ya nombra canila como canda Gina Belsa Granada, el secretarya del antes Guerrilla Front Big Beautiful Country, y si Benedicto Agravante Granada, el deputado secretarya del mismo grupo.
El antes Guerrilla Front Big Beautiful Country baho este del Western Mindanao Regional Party Committee del rebelde grupo NPA.
El dos NPA surrenderers ya amiti cay ya decidi sila rindi na govierno por causa ya bunca ya el restante group del NPA aqui na Zamboanga Peninsula.
Asegun canila cay cansao ya tambien sila de esconder por causa del sin descanso ofensiva del fuersa military contra con el mga restante mymebros del rebel NPA aqui na rehyon.
Asegun con Coderos con el man maridable NPA surrenderers ya pone baho el atencion medical y ta esta ahora na custodiya del su mando.
Asegun con Coderos ay ase tamen sila el proceso del mga documentos para puede tamen beneficia el man maridable con el programa del govierno nombrao como el Enhanced Comprehensive Local Integration Program (ECLIP).
El ECLIP amo un programa del govierno para ayuda con mga antes myembros del NPA bira na sociedad y vive un normal y pacifico vida hunto con el de ila familya. (Bong Garcia)