Despues del exitoso conducida del Zamboanga Peninsula Regional Athletic Association (ZPRAA) Qualifying Meet 2024, esperansao cay hay conduci otro evento de deportes aqui na ciudad del Zamboanga este año.
Ese el Philippine Reserve Officers’ Training Corps (ROTC) Games (PRG)-Mindanao Leg desde Junio 23 hasta 29, este año, asegun con Dr. Cecile Atilano, el jefe del division de deportes del ciudad.
Si Atilano, mga oficiales y representantes del Philippine Sports Commission (PSC), Commission on Higher Education y Departamento de Defensa Nacional recientamente ya inspecciona con el mga lugar de juego y lugar donde esta mga atleta para asegura el preparacion del mga facilidad del evento de deportes na entero Mindanao.
El ciudad de Zamboanga hay servi como el lugar del evento del mencionao deportes por segundo año consecutivo.
El PRG intendido para alenta con el desarollo del programa de deportes, promove educacion fisico y fomenta autodisciplina, colaboracion y excelencia.
El PRG intendido tamen para enseña con mga joven atletas para na mga competicion internacional, tambien suplementa el programa para del mga juventud. (B. Garcia)