El mga operativas del Regional Drug Enforcement Unit-9 (RDEU-9) ya tene nuevo grande acomplicimiento arestando un high-value target (HVT) suspechao y ya confisca valor de P6.8 millones droga ilegal na un operacion contra droga na provincia del Zamboanga Sibugay, asegun con el policia del Miercoles.
El mando regional del policia nohay kas identifica con el arestao HVT puera lang de habla’r el suspechao es un 50 años de edad residente de Barangay Arena Blanco, ciudad de Zamboanga.
Asegun con el policia, con el suspechao HVT ya aresta na un operacion de compra busto mga alas 7:25 del Lunes denoche na Purok A, Barangay Poblacion, Kabasalan, Zamboanga Sibugay.
Asegun con el policia, ya confisca na posesion del arestao HVT suspechao un kilo de suspechao shabu enpaquetao na un sellado el vacio transparente plastico con el valor de P6.8 millones, 699 pedaso del P1,000 robar dinero que ya pone encima un real P1,000 markao dinero, y un celpon.
Con el suspechao ya detene na quartel del policia na provincia del Zamboanga Sibugay en preparacion para el plantada del caso contra conele por violacion del Ley Intergral de Drogas Pelilgrosas de 2002.
El aresto de suspechao HVT ya vene un dia despues que el mga operativas de RDEU-9 ya aresta un miliciano y ya confisca valor de P6.8 millones droga ilegal.
Con el miliciano, con quien ya aresta del Domingo denoche na ciudad de Zamboanga, es un residente de Barangay Buton, Hadji Mohammad Ajul, provincia de Basilan. (B. Garcia)