Un soldeador el ya aresta y ya confisca un pusil y valor de P102,000 droga ilegal mga autoridad na un checkpoint na costa este del ciudad, asegun con el policia local del Domingo.
Asegun con el policia local, con el arestao soldeador ya conoce como si Anthony Guevarra, 31 años el edad y residente del Barangay Pasobolong, en este ciudad.
Asegun con el policia, con Guevarra ya aresta mga alas 5:20 del Sabado aga na Barangay Divisoria, 6.2 kilometeros este del ciudad.
El mga personajes del Zamboanga City Police Station 5 (ZCPS5) ta conduci un checkpoint cuando ya ase sila para un motorciclo que ta maneja si Guevarra para inspecciona.
Asegun con el policia, durante el inspeccion, ya nota el mga pulis cay tiene cosa ta sobresale na bag de cinturon de Guevarra.
El policia ya habla, el mga pulis ya mira cay ta contene un calibre .45 pistola cuando ya manda sila con Guevarra abre su bag de cinturon.
El mga pulis ya aresta y ya habla con Guevarra su mga derechos bajo el ley.
Asegun con el policia, ya puede tamen sila confisca mas o menos 15 gramos de suspechao shabu enpaquetao na 56 diutay paquetes de plastic que tiene el valor de P102,000, nueve bala de calibre .45 pistola, sinco celpon, dos tijeras de surgical, un motorciclo, P7,220 dinero de diferentes denominacion, y otros pa mga cosas.
Con Guevarra ya detene na quartel del ZCPS5 en preparacion para el plantada del asunto contra conele por violacion del Comprehensive Dangerous Drugs Act of 2002. (B. Garcia)