Un maestra y sinco otro personas el ya iri na un accidente vehicular envuelto un Piaggio triciclo y truck na costa Oeste del ciudad de Zamboanga, asegun con el policia local del Domingo.
Asegun con el policia local, el accidente vehicular ya ocuri mga alas 4:15 del Sabado tarde na Barangay Talisayan, 26 kilometros Oeste del ciudad.
El policia local, ya nombra con el mga victima como si Charlie Gumotud, 57 años el edad y chufer del Piaggio triciclo y su mga pasajeros canda Pilar Alabat, 62, un maestra; Marsid Gumotud; Sheryl Mae Gumotud; y nohay mas nombra con el dos menor de edad victima.
Asegun con el policia, ya man bangga con el Piaggio triciclo ta maneja si Charlie el un trak que ta sige canila atras cuando derepente le ya bira para na lao isquierda del camino.
El Piaggio triciclo ya guinda na canto’y camino y ya buta con el mga pasajeros para na cemento por causa del impacto cuando ya man bangga canila el trak que ta maneja si Gilbert Gaspar, 56 años.
Asegun con el policia, con el mga victimas ya lleva na dos mga hospital publicos para el curada medical mientras nohay pasa nada con Gaspar. (B. Garcia, photo courtesy of Talisayan Kagawad Alexander Guerrero)