Dos alto oficiales de militar ya discuti mga potencial desafios que possible ay ocuri na mga lugar bajo’l juridiccion del 45th Infantry Battalion (IB) na provincia del Basilan.
Ese el parte del cosa ya discuti cuando ya visita de cortesia si Tiniente Coronel Michael Colanta, comandante del 45IB, con Brigadier General Alvin Luzon, comandante del 101st Infantry Brigade, na quartel del brigada na Barangay Tabaiwan, ciudad de Isabela, el capital del Basilan, del Sabado.
Ya man cuento el dos oficiales sobre mga exitoso estrategias de seguridad que ya implementa el 101st Infantry Brigade na provincia de Basilan.
Ya explora tamen el dos oficiales varias aprochados que puede usa el 45IB para diriji mga conciernes de seguridad y promove paz.
El 45IB ya llega na provincia de Basilan del ultimo semana del mes de Enero para reforza con el campaña de seguridad del 101st Infantry Brigade.
El 45IB ya establisa de ila quartel na Barangay Bohe Pahu, Ungkaya Pukan, Basilan. El 45IB estaba na provincia del Sulu. (B. Garcia, photo courtesy of 101st Infantry Brigade)