El pulisiya ya puede aresta con un mentao drug pusher y ya confisca tresientos mil de pesos valor de suspechao shabu na un campanya contra droga ilegal ayer tarde alli na Baliwasan, este ciudad.
Asegun con Major Shellamie Chang, portavoz del mando rehional del pulisiya, con el arestao suspechao ya conose como si Jaber Antam, treynta’y dos anios el edad.
Asegun con Chang con Antam ya aresta na un buy-bust operation maga alas tres cuarenta’y cuatro ayer tarde na Timex Compound, Barangay Baliwasan.
Ya puede recubri na posesyon de Antam sien gramos de suspechao shabu que tiene el cantidad del tresientos mil de pesos, treynta’y nueve pedaso de mil pesos boodle money y un mil pesos markao sen.
Detenido ahora si Antam myentras ta prepara ya el maga documento para el plantada de formal asunto contra con el suspechao. (Bong Garcia)