Ya aresta mga autoridad con un chufer de edad y ya confisca P136,000 valor de droga ilegal na un campanya contra droga aqui na ciudad de Zamboanga, ya anuncia el pulisiya local del Miercoles.
Asegun con Police Major Sonny Boy Perez, el hefe del Zamboanga City Police Station 6 (ZCPS6), con el arestao chufer ya conose como si Edgardo Francisco, 63 años el edad y residente de Barangay Tugbungan, en este ciudad.
Asegun con Perez, con Francisco ya aresta na un “buy-bust operation” mga alas 5:52 del Miercoles aga na Sitio Picnic Ground, Barangay Tugbungan.
Durante su aresto, si Perez ya habla cay ya puede confisca na posesion de Francisco 20 gramos de suspechao shabu que tiene el valor de P136,000, un pitaka, y P200 markao sen.
Si Perez ya habla cay ta bisia ya sila el mal actividades de Francisco antes ya ase sila el campanya contra con el suspechao.
El suspechao detenido ahora en preparacion para el plantada del formal asunto encontra conele na jusgado. (B. Garcia, photo courtesy of ZCPS6)