l mando del pulisiya rehyonal ya confisca mas de P2 milyones cantidad de droga ilegal aqui na rehyon durante el un semana enforsada de ley y campanya contra criminalidad.
Asegun con Police Brigadier General Bowenn Joey Masaudding, el director rehyonal del pulisiya, ya conduci sila total de 20 “buy-bust operations” desde Septiembre 1 hasta 7 que ya resulta na confiscacion de 296.190 gramos de suspechao shabu que tiene el total valor de 2,014,020.
Asegun con Masaudding, el siete dias campanya contra droga ilegal ya resulta na aresto de 24 personas envuelto na uso y vendida de droga.
Si Masaudding ya habla cay tiene tamen el total de 66 pusil sin licensia el ya rindi canila, ya confisca 4 pusil nohay licensia y ya entrega canila 70 pusil para recuji.
Durante el sietes dias campanya, total de 76 “wanted” personas el ya aresta, incluwido 12 el bien “wanted” personas, myentras 16 rebelde New People’s Army el ya rindi.
Na campanya contra contrabando, total del P3.1 milyones cantidad del cigarillo el ya puede confisca na entero rehyon.
Asegun con Masaudding el enforsada del ley y campanya contra criminalidad parte del “5-focused agenda” del hefe del pulisiya nacional, Heneral Benjamin Acorda, que ta incluwi el agresivo y honesto enforsada del ley. (B. Garcia)