El Police Regional Office-Bangsamoro Autonomous Region (PRO-BAR) ya dale medalla con un pulis quien ya salva na un incidente de emboscada, pero irido, na provincia del Lanao del Sur, asegun con el PRO-BAR del Lunes.
El PRO-BAR ya habla, el recipiente del medalla amo si Patrolman Hashemi Sumusod del estacion de policia na municipio de Picong, Lanao del Sur.
Si Police Brigadier General Prexy Tanggawohn, el interino director del PRO-BAR, personalmente ya pone el Medalya ng Sugatang Magiting (PNP Wounded Personnel Medal) na pecho de Sumusod cuando ya visita el oficial con el pulis na Pagadian City Medical Center del Sabado.
“Este comendable acomplisimiento es un claro manifestacion del compromiso y dedicacion na deber de Sumusod como ya exemplifica le por medio del actuacion na su trabajo maskin sabe le cay delicao el mision,” si Tanggawohn ya habla.
Si Sumusod y otro mga personajes del policia del Picong, Lanao del Sur, muntao na coche de patrulla cuando ya embosca canila mga armao personas mientras pa birada na de ila quartel despues que a conduci operacion na Barangay Miculabo, Picong, Lanao del Sur, del Abril 18.
Despues del visitada con Sumusod na hospital, si Tanggawohn ya ase tamen visitada de cortesia na quartel del Area Police Command-Western Mindanao na ciudad del Pagadian, el capital del provincia de Zamboanga del Sur. (B. Garcia)
