El mga autoridad ya aresta dos high-value targets (HVTs) y ya confisca P6.8 million valor de droga ilegal na un campaña contra droga na provincia del Lanao del Sur, asegun con el Philippine Drug Enforcement Agency del Lunes.
Si Gil Cesario Castro, el director del PDEA na Bangsamoro Autonomous Region in Muslim Mindanao (BARMM), ya nombra con el dos arestao HVTs como canda Abdul Dioangaan, 47 años el edad, y si Panarigan Radia, 49, ambos mga residentes del Barangay Dilimbayan, Lumbayanague, Lanao del Sur.
Asegun con Castro, con el dos ya aresta na un operacion de compra busto envuelto el vendida de un kilo de suspechao shabu mga alas 2:10 del Sabado tarde na Barangay Saduc, ciudad de Marawi.
Asegun con Castro, ya recubri na posesion del dos arestao HVTs mas o menos un kilo de suspechao shabu enpaquetao na un aluminio paquete que tiene el valor de P6.8 millon, dinero de compra busto, un celpon, un wallet, y un tarjeta de identificacion.
El mga arestao suspechao detenido na carcel del PDEA-BARMM en preparacion para el plantada del asunto por violacion del Comprehensive Dangerous Drugs Act of 2002.
Si Castro ya habla el operacion de compra busto del PDEA-BARMM ya conduci con el suporta del 3rd Scout Ranger Battalion, operativas de inteligencia, 500 Combat Engineering Battalion and personajes del policia na provincial del Lanao del Sur. (B. Garcia)
