El mga autoridad ya salva con 13 mga victimas potencial de trafico humano na provincia de Tawi-Tawi, asegun con el policia del Lunes.
Asegun con el Police Regional Office-Bangsamoro Autonomous Region (PRO-BAR), con el mga victimas potencial ya salva mga alas 6:45 del Viernes aga na pantalan del Bongao, el capital del provincia de Tawi-Tawi.
El PRO-BAR ya habla, con el mga victimas potencial ya salva despues que ya recivi informacion el mga autoridad cay tiene un grupo de mga personas el ta viaja para na Sabah, Malaysia por medio del Bongao, Tawi-Tawi.
Base na investigacion, el destino del mga victimas potencial, quien ya falla presenta documentos legal, amo el ciudad de Sandakan na Sabah, Malaysia.
Con el mga salvao personas ya pone bajo’l custodia del Municipal Inter-Agency Committee Against Trafficking (MIACAT) y Ministerio de Servicio Sociales y Desarollo para el consejo, interogacion de tension, y ayuda.
Mientras tanto, el policia na provincia de Tawi-Tawi y otro mga concierne agencias de gobierno ta facilita ya para el librao birada del mga victimas potencial na de ila familia y origen lugar.
Si Police Brigadier General Prexy Tanggawohn, el interino director del PRO-BAR, ya comenda con el mga operativas quien de lijero ya constesta que ya resulta na librada del mga potencial victima de tafrico humano.
Si Tanggawohn ya reafirma cay el PRO-BAR hay continua hace el esfuerzo para pone pin con el actividad de trafico humano y hace con el BARMM un librao lugar para contodo.
Con el mga victimas potencial de trafico humano ya salva mga personajes del policia, Guardia Costera de Filipinas, MIACAT y National Intelligence Coordinating Agency. (B. Garcia)
