Un guardia quien na mismo tiempo encargao de un “apartment” el ya aresta mga autoridad por el asunto de robo, asegun con el policia local del Miercoles.
El Zamboanga City Police Station 5 (ZCPS5) ya nombra con el arestao guardia como si Marvin Delos Reyes, 41 años el edad y residente de Barangay Vitali, en este ciudad.
Asegun con el ZCPS5, con Delos Reyes ya aresta mga alas 3:30 del Miercoles aga na Paseo de Marcos, Barangay Putik, en este ciudad.
Asegun con el ZCPS5, con Delos Reyes ya aresta base na reclamo del dos ocupantes del apartment que ta guardia el suspechao.
Con el mga reclamantes ya conose como canda Judith Marie Kithcurt, 64 años el edad, un retirao soldao y un nativo del Georgia, Estados Unidos del America, y si Maria Lourdes Conde, 64 años el edad.
Asegun con el ZCPS5, base na reclamo de canda Kithcurt y Conde cay mucho del de ila mga cosas personal incluwido dinero ta perde especialmente si nohay sila na apartment.
El dos reclamantes ya llama na ZCPS5 y ya confronta con Delos Reyes donde mga pulis ya puede recubri na su posesion el un pulsera de Conde.
Sin embargo el relo, mga alajas y P49,000 de Conde ta esta perdido.
Ta esta tamen perdido el pasaporte, visa de imigracion, P86,000 y otro importante documentos de Kithcurt.
Asegun na investigacion cay si Delos Reyes amo el ta agara con el mga llave como el guardia y encargao del apartment.
Con Delos Reyes ya aresta si Police Corporal Jarry Malacapo y ya entrega con ele na ZCPS5 para el propio accion. (B. Garcia, photo courtesy of ZCPS5)