El Western Mindanao Command (Westmincom) ya anuncia del Miercoles cay mga oficiales del barangay na Datu Montawal, Maguindanao del Sur voluntariamente ya rindi de ila mga pusil sin licensia na militar.
Asegun con el Westmincom, 13 pusil sin licensia el ya entrega mga barrio capitan del 11 barangays del Datu Montawal na un ceremonia del Lunes que ya hace na gym del mencionao municipio.
Con el mga pusil o armas de fuego ya presenta con Alcalde Ohto Montawal del municipio de Datu Montawal y con Major Rowel Caacbay, el ejecutivo oficial del 90th Infantry Battalion (IB).
El mga pusil ya rindi mga barrio capitan ta incluwi sinco Rocket-Propelled Grenade launchers, un shotgun, un riple calibre .22, dos calibre .50 Barret Sniper Rifles, un 60-mm mortar, un M-15 sniper rifle, y dos M-79 grenade launchers.
Asegun con el Westmincom, el rindida del mga armas de fuego es un resulta del esfuerso del 90IB, pulisiya del Datu Montawal y Commission on Elections para eradica mga pusil sin licensia, mantencion de paz y estabilidad del lugar para asegura el librao y guardiao eleccion del mga oficiales de barrio y del mga jovenes.
Con el mga armas de fuego que ya rindi mga oficiales del barrio na Datu Montawal ya deposita na quartel del 90IB. (B. Garcia, photo courtesy of 90th Infantry Battalion)