Un persona el arestao myentras P350,000 cantidad de contrabando ya confisca mga otoridad na un campanya contra smuggling aqui na ciudad de Zamboanga.
Si Police Major Albin Cabayacruz, el hefe del Zamboanga City Police Station 5 (ZCPS5), ya nombra con el arestao suspechao como si Jani Sabuddin, 39 años el edad y un residente de Barangay Kasanyangan, este ciudad.
Si Cabayacruz ya habla cay con Sabuddin ya aresta y mga contrabando ya confisca mga alas 11 del Lunes denoche na Sitio Lumiyap, Barangay Divisoria, este ciudad.
Asegun con Cabayacruz cay ta conduci sila checkpoint cuando ya ase sila para un vehiculo que ta maneja si Sabuddin para inspecciona.
Si Cabayacruz ya abla cay durante el inspeccion, ya descubri sila ta contene mga cahon de cigarillo el vehiculo ta maneja si Sabuddin.
Enseguidas ya aresta con Sabuddin despues que nohay le puede presenta documento del mga cigarillo ta transporta le.
Asegun con Cabayacruz ya puede sila confisca na vehiculo de Sabuddin 10 cahon de smuggled cigarillo que tiene el estimao valor de P350,000.
Con Sabuddin, el vehiculo y mga confiscao cigarillo ya pone bajo el custodiya del ZCPS5 para el propio documentacion.
Esperansao entrega el pulisiya con Sabuddin, el vehiculo y mga confiscao cigarillo na Buro de Aduana para el propio disposicion. (B. Garcia, photo courtesy of Zamboanga City Police Station 5)