Ya aresta mga pulis con un “watch-listed” suspechao y ya confisca P340,000 cantidad de alegao shabu na un campanya contra droga ilegal aqui na ciudad de Zamboanga.
Si Police Colonel Alexander Lorenzo, el Zamboanga City Police Office (ZCPO) director, ya nombra con el arestao suspechao como si Josel Feliciano Jupuri, 36 años el edad, un chufer de pedicab y residente de Barangay San Roque, este ciudad.
Asegun con Lorenzo cay con Jupuri ya aresta na un “buy-bust operation” mga alas 11:14 del Lunes denoche na Sitio Fishpond, Barangay Rio Hondo, este ciudad.
Asegun con Lorenzo ya puede recubri na posesion de Jupuri un grande pakete ta contene 50 gramos de suspechao shabu que tiene el estimao valor de P340,000 y un markao P500.
El suspechao bajo ahora na custodiya del ZCPO Station 11 en preparacion para el plantada del formal asunto contra conele. (B. Garcia, photo courtesy of Zamboanga City Police Office)