General Santos City – Nagbahad karon ang bag-ong City Administrator ning s’yudad sa General Santos, Atty. Franklin Gacal Jr; nga ipadakop gayud sa LGU-Gensan ngadto sa kapulisan ning dakbayan ang si bisan kinsa mang namaligya og mga smuggle o palusot nga mga sigarilyo. Kana ang gipahayag sa maong Opisyal atol sa usa ka Press Conference alang sa hingpit nga pagpatuman sa Ordinance No. 56, Series of 2017- the Anti-Smoking Ordinance of General Santos City karong panahona.
Maoy nagpasi-ugda sa maong PressCon ang City Health Office (CHO), Department of Health (DOH), World Health Organization (WHO), ug General Santos City Police Office (GSCPO).
Nagtuo si Atty. Gacal nga daku’g kabahin sa pagpadayon sa pagpanigarilyo sa katawhan sa Gensan hangtud karong panahona luyo sa kamahal sa orihinal nga presyo matag-stick o matag-kaha niini ug luyo sa namugna nang daan nga Ordinansa. Kini tungod daghan karo’g barato ra kaayong sigarilyo nga smuggle o palusot gikan sa laing nasud, ang gakatap karon sa dakbayan sa Gensan ug gika-ingong pareho ra ang lasa niini sa orihinal nga sigarilyo. Tungod niini, i-rekomendar matud pa niya ngadto kang Gensan City Mayor Lorelie Pacquiao nga pagpagawas og Memorandum direkta ngadto kang Gensan PNP City Director Jomar Alexis Yap nga magmando nga dakpon ang mga namaligya’g peke nga mga sigarilyo sa tibuok s’yudad. (Rem C. Agdon)