El Ministerio de Interior y Gobierno Local, o MILG, del Bangsamoro Autonomous Region in Muslim Mindanao (BARMM) oficialmente ya entrega siete vehiculos de patrulla policial con el Police Regional Office-Bangsamoro Autonomous Region (PRO-BAR) para fortalece el aplicacion de ley na region.
Asegun con el PRO-BAR del Sabado, el Abogao Sha Elija Dumama-Alba, el ministro del MILG, ya encabesa con el entregada del siete vehiculos de patrulla durante un ceremonia del Viernes na centro del gobierno del BARMM na ciudad de Cotabato.
Si Alba ya enfatiza cay el mga vehiculos de patrulla es paso esencial na mejorada del capabilidades de aplicacion de ley y grantiza el seguridad publico.
Na su mensaje, si Alba ya destaca el importancia del mantencion de paz y seguridad para el progreso del BARMM y ya llama con el policia para usa el recursos sabiamente na servida con el comunidades na BARMM.
Si Police Colonel Julius Cecil Ordoño, el official en-cargao deputy regional director for administration (DRDA) del PRO-BAR, ya recivi con el mga vehiculos por parte de Police Brigadier General Romeo Macapaz, el director del PRO-BAR.
Si Ordoño ya expresa su gratitud por el continuado suporta desde’l MILG y gobierno del BARMM, reconociendo cay el mga vehiculos de patrulla hay mejora enormemente con el esfuerzos del policia na mantention de paz y orden na region.
El ceremonia, que ya inclui tamen el firmada de un Memorando de Acuerdo, ta descata el dedicacion para fortalece el aplicacion de ley para el paz y seguridad na BARMM. (B. Garcia)