El Bangsamoro Transition Authority (BTA) ya aprova para establisa cuatro nuevo hospital na mga provincias de Tawi-Tawi, Maguindanao del Norte, y Lanao del Sur.
El BTA ta servi como el legislativo del Bangsamoro Autonomous Region in Muslim Mindanao (BARMM).
El unanimamente aprovamiento ya hace durante el especial sesion del Viernes, con mga legisladores pasando con el Parliament Bill Nos. 99, 123, 139, y 257.
Si Dr. Hashemi Dilangalen, el chairperson del comitiba de salud del BTA, ya habla cay ya tarda ya ta desea tene hospital na tres provincias el mga vivientes, quien ta padese con limitao acceso na calidad servicios de cuidada de salud y muchas beses ta viaja pa por largo hora para anda na mas serca facilidades medical.
El aprovamiento del BTA Bill Numero 99 hay establese un 50-cama nivel uno hospital general na municipio del South Ubian, Tawi-Tawi, mejorando el acceso del mga residentes na cuidada de salud.
El hospital hay servi con el terser clase de municipio, que tiene limitao recursos na cuidada de salud del mga pasao años.
El BTA Bill Numero 123 ta llama para el construccion del Pura Municipal Hospital (PMH) na Barangay Pura, Datu Blah Sinsuat, Maguindanao del Norte, con 25-cama capacidad.
El BTA Bill Numero 139 ta autoriza el construccion del Northern Kabuntalan Municipal Hospital, un 50-cama nivel uno hospital general que hay mejora el servicios de cuidada de salud na Norte parte del provincia de Maguindanao del Norte.
El BTA Bill Numero 257 ya aprova el establicida del Aleem Abdulazis Mimbantas Memorial Hospital na Masiu, Lanao del Sur, que hay proporciona un 50-cama hospital general.
Asegun Dilangalen, el aprovada del mga propuesto leyes es el resulta del extensivo consultationes con el comunidades local, donde el mga legisladores personalmente ya puede mira el necesidades de cuidada de salud del mga gente.
Si Dilangalen ya enfatiza el urgencia del mga proyectos, señalando cay mucho del mga lugar ya tarda ya nohay o palta infraestructura de salud.
Asegun con Dilangalen, con el mga hospital que hay construi hay pone bajo el supervision administrativo del Miniesterio de Salud na region autonomo. (B. Garcia)