El 1st Infantry “Tabak” Division (1ID) ya rendi tributo con Major General Reguyal Sison, comandante del 3rd Infantry Division (3ID), con completo honores de llegada militar, asegun con el 1ID del Sabado.
El evento ya conduci durante el llamada de salida de Sison que ya hace del Miercoles na grandstand del 1ID na Campo Cesar Sang-an, Barangay Upper Pulacan, Labangan, Zamboanga del Sur.
Un miembro orgulloso del Philippine Military Academy “Sambisig” Class of 1991, si Sison ya refleja na su carrera y ya comparti sincero palabras durante su discurso de despidida.
Asegun con Sison, el 1ID amo su primer asignacion de unidad y con orgullo le ta habla cay un tropa le del “tabak’.
Durante el occasion, si Major General Gabriel Viray, III, el comandante del 1ID, ya presenta plaque de mando con Sison como un reconocimiento na su significante contribuciones con el 1ID.
Sucesivamente, si Sison ya ofrece un plaque y recuerdo para honra el invaluable suporta y contribuciones del 55th Infantry Battalion durante su primeros años como un leader de peloton y ejecutivo official de compania—momentos que ya acredita le como instrumental na configuracion del su exitoso carrera na Philippine Army.
Asegun con el 1ID, el ceremonia es un testamento na dedicacion y legacia de Sison, y tambien es un camaraderia y respeto mutual compartido dentro del rango del fuerza armada.
Durante su llamada de salida, con Sison ya recivi calurosamente si Viray, hunto con mga oficiales, personal alistado y personal civil durante el ceremonia. (B. Garcia)