El Presidente Ferdinand Marcos, Jr., personalmente ya entrega valor de P80.9 millon cheke desde su oficina para na Camp Navarro General Hospital (CNGH) aqui na ciudad.
El Presidente Marcos ya entrega con el valor de P80.9 millon cheke cuando ya visita le del Viernes na CNGH aqui na ciudad.
Si Tiniente Coronel Giovani Falcatan, el jefe del CNGH, ya recivi con el cheke que ya dale el Presidente na presencia del Departamento de Defensa Nacional Secretario Gilberto Teodoro y otro mga alto oficiales del militar y del gobierno.
El Western Mindanao Command (Westmincom) ya habla del Sabado cay con el fondo hay usa para compra mga equipo para del cuarto de operacion del hospital, diagnosticos, pabellon, terpia fisica, y otro servicios medical.
Durante el visitada del Presidente Marcos, ya inspecciona tamen ele con el nuevo construido edificio del CNGH, que intendido para dale servicio medical critical y suporta con mga soldao y personajes civilian y de ila mga dependientes.
El CNGH es un hospital de nivel de enfermeria na quartel del Westmincom na Campo Navarro, Calarian, en este ciudad.
El hospital ta dale servicio medical con mga soldao, recursos humano civilian, y de ila dependientes. El hospital tiene el capacidad desde 50 para 100 cama.
Si Tiniente General William Gonzales, el comandante de Westmincom, ya rindi su gratitud con el jefe comandante por su constante suporta con el militar aqui na Mindanao y na entero pais. (B. Garcia)