El mga autoridad ya confisca P540,000 valor de contrabando na un lejanos lugar na provincia de Sulu, asegun con el policia na region autonomo del Martes.
Asegun con el Police Regional Office-Bangsamoro Autonomous Region (PRO-BAR), con el mga contrabando ya confisca del Jueves denoche na Sitio Pamawlan na barrio de Kajatian, Indanan, Sulu.
Asegun con el PRO-BAR, con el mga contrabando ya puede confisca despues que ya reporta na policia del municipio de Indanan el un miembro del Barangay Intelligence Network sobre el descargada del mga cajon-cajon de cigarillo na canto’y aplaya del Barangay Kajatian.
El mga pulis ya encontra 45 cajon de diferente clase de cigarillo que tiene el valor del P540,000 cuando ya llega sila na canto’y aplaya del Kajatian.
Con el mga cigarillo ya abandona el mga desconosidos personas quien ya transporta con el mga contrabando usando jungkong.
Asegun con el policia, con el mga cigarillo hay entrega era na local mercao publico.
Con el mga confiscao cigarillo ya pone bajo’l custodia del policia na Indanan y esperansao entrega na Buro de Aduana para el propio disposicion.
Mientras tanto, si Police Brigadier General Prexy Tanggawohn, el director del policia na region autonomo, ya comenda con el policia de Indanan por el confiscacion del contrabando.
Si Tanggawohn ya comenda tamen con el mga residentes quien ya dale vital informacion que ya resulta na rapido accion del policia.
Si Tanggawohn ya promete intensifica con el esfuerzo contra criminalidad y persegui con aquellos que ta viola con el ley mientras continuando ta enforza con mga legal orden. (B. Garcia)