El mga autoridad ya confisca mas de P12 millon valor de smuggled cigarillo y ya salva con dos menor de edad victima de trabajo de bata na provincia de Sulu, asegun con el policia del Jueves.
Asegun con el Police Regional Office-Bangsamoro Autonomous Region (PRO-BAR), con el mga smuggled cigarillo ya confisca del Martes na Sitio Laum Niyog, Barangay Kajatian, Indanan, Sulu.
El PRO-BAR nohay mas nombra con el dos menor de edad con quien ya salva cuando ya confisca mga pulis con 210 cajon de cigarillo que tiene el valor de P12,033,000.
Asegun con el policia, ta esta desconocido el dueño del mga smuggled cigarillo quien nohay na lugar cuando ya confisca el mga pulis con el mga smuggled cigarillo.
Asegun con el PRO-BAR, con el dos librao bata ya pone bajo’l custodia del policia na municipio del Indanan pendiente el investigacion.
Con el mga confiscao smuggled cigarillo hay entrega na Buro de Aduana para el propio disposicion.
El PRO-BAR ta esta comitido y determinao eradica con el ilicito comercio de cigarillo que hinde lang ta prejudica con el gobierno de impuesto si no delicao tamen na salud del publico. (B. Garcia)