El mga autoridad ya confisca P1.2 millones valor de smuggled cigarillo na municipio del Jolo, na provincia del Sulu, asegun con el policia del Lunes.
Asegun con el Police Regional Office-Bangsamoro Autonomous Region (PRO-BAR), con el mga smuggled cigarillo ya confisca del Viernes denoche na Zone 3, Barangay Tulay, Jolo.
Asegun con el PRO-BAR, el mga personajes del policia de Jolo y Regional Mobile Force Battalion14-B, ta conduci checkpoint cuando ya hace sila para un vehiculo para inspecciona.
Pero, asegun con el PRO-BAR, el chufer del vehiculo y su compañero ya escapa dejando con el de ila vehiculo.
Asegun con el PRO-BAR, el mga pulis ya descubri cay el vehiculo ta contene 34 cajon de cigarillo que tiene el valor de P1,258,000.
El policia, ta continua de ila investigacion para busca y aresta con el mga gentes envuelto na smuggling del mga cigarillo. (B. Garcia)