El 11th Infantry Division (11ID) ya designa con Colonel Alaric Avelino Delos Santos como el interino comandante del 1102nd Infantry Brigade base na provincia del Sulu, asegun con el militar del Lunes.
El instolacion de Delos Santos como el interino comandante del 1102Bde ya vene despues que oficialmente ya retira si Brigadier General Giovani Franza desde’l servicio militar del Domingo, Octubre 20.
Si Major General Leonardo Peña, el comandante del 11ID, ya instola na puesto con Delos Santos durante el ceremonia de parada testimonial en honor de Franza del Sabado na Campo Teodulfo Bautista na Barangay Busbus, Jolo, Sulu.
Si Franza, quien un orgulloso miembre del Philippine Military Academy “Sambisig” Class de 1991, oficialmente ya retra desde’l servicio militar del Domingo.
Si Peña ya extende su profundo gratitud con Franza por el de suyu 37 años de dedicao servicio con Dios, Pais, y Gente.
Asegun con Peña, el liderato y dedicacion de Franza na servicio ya contribui mucho na progreso, particularmente na formentada de paz y orden na Sulu. (B. Garcia)