Un suspechao carnaper el ya aresta el mga autoridad cuantos minutos despues del incidente de robo de un motorciclo na pueblo del ciudad de Zamboanga, asegun con el policia local del Martes.
El policia local ya nohay mas nombra con el arestao suspechao puera lang de hablar cay un hombre ele quien tiene el edad de 39 años y un residente del Barangay Tonggusong, Simunul, Taw-Tawi.
Asegun con el policia, con el suspechao ya aresta el mga personajes del Zamboanga City Police Station 11 (ZCPS11) na un privado pantalan na Barangay Baliwasan, ciudad de Zamboanga.
Asegun con el policia, el mga personajes del ZCPS11 enseguidas ya conduci operacion despues que ya reporta canila el dueño cay ya ruba con el de suyu motorciclo.
Asegun con el dueño quien un mujer, ya estaciona le su motorciclo mga alas 8:45 del Lunes aga enfrente de un establicimiento de negocio para compra carne.
Asegun con el dueño, nohay mas el de suyu motorciclo cuando ya bira ele otravez.
Asegun con el policia, el arestao suspechao y el recubrido motorciclo bajo ahora na custodia del ZCPS11 para el propio disposicion.
Asegun con el policia, con el motorciclo ya hace ya subi na un lancha que esperansao viaja para na provincia de Tawi-Tawi cuando ya aresta con el suspechao y recubri con el motor. (B. Garcia)