El mga autoridad ya aresta na un operacion de aplicacion de ley un persona mas buscada na uno del dos ciudad na provincia del Zamboanga del Norte, asegun con el policia del Viernes.
El mando regional del policia, o Police Regional Office-9 (PRO-9), ya identifica con el arestao persona como si Robert Pularan, el numero uno persona mas buscada na ciudad de Dipolog, el capital del provincia del Zamboanga del Norte.
Asegun con el policia, con Pularan ya aresta na un operacion del aplicacion de ley por medio na implementacion de orden de aresto mga alas 4:50 del Martes tarde na Sitio North Curvada, Barangay Galas, ciudad de Dipolog.
El policia ya habla, si Pularan tiene pendiente orden de aresto por el crimen de dos cuentas de conducta lasciva en violacion de ley de Especial Proteccion del mga Bata contra Abuso, Exploitacion, y Acto de Discriminacion.
El policia ya habla, el orden de aresto contra con Pularan ya dale el un corte na ciudad de Dipolog, Zamboanga del Norte.
Con Pularan ya pone bajo’l custodia del policia na ciudad de Dipolog para el propio disposicion. (B. Garcia)