Tres personas mas buscada na Zamboanga Peninsula el ya aresta el mga autoridad na separao operacion de aplicacion de ley, asegun con el policia del Jueves.
El mando regional del policia o Police Regional Office-9 (PRO-9), ya identifica con el mga arestao personas mas buscada como canda Joan Vicente Mariano, y James Ryan Baloro, ambos mga numero sinco personas mas buscada na region; y si Jaybrian Abala Rivera, numero uno persona mas buscada na region.
Asegun con el policia, con Mariano ya aresta el combinao grupo de pulis y militar mga alas 2 del Martes tarde na Purok 5, Barangay Labasan, Siay, Zamboanga Sibugay.
Asegun con el policia, si Mariano tiene pendiente orden de aresto sin recomendao piansa por el crimen de calificao trafico que ya dale el un corte na ciudad de Zamboanga del Deciember 28, 2023.
El policia ya habla, con Baloro ya aresta mga alas 3:45 del Martes tarde na Purok 2, Suguilon, Siayan, Zamboanga del Norte.
Si Baloro tiene pendiente ordende aresto por el crimen de abuso carnal que ya dale el corte na Molave, Zamboanga del Sur del Marso 27, 2024.
Asegun con el policia, con Rivera ya aresta mga alas 3 del Lunes tarde na carretera nacional in Barangay Tulic, Argao, provincia de Cebu.
Si Rivero tiene pendiente orden de aresto por violacion del Ley de Republica 9165 o mas conocido como el Ley Integral de Drogas Peligrosas de 2002.
Si Police Brigadier General Bowenn Joey Masauding, el director del mando regional del policia, ya comenda con el mga operativas por el exitoso aresto del tres personas mas buscada na region.
“El de ustedes policia hay continua conduci operaciones de aplicacion de ley para cogi con aquellos quien ta enfrenta caso na corte,” si Masauding ya habla. (B. Garcia)