Tres personas, incluido un vendedor y dos consumidores de droga ilegal, el ya aresta el mga autoridad na un campaña contra droga na ciudad del Lamitan provincia del Basilan, asegun con el policia del Domingo.
Si Police Lieutenant Colonel Arlan Delumpines, el jefe del policia na ciudad de Lamitan, ya nombra lang con el arestao vendedor de droga como un tal Basser, quien el objeto del operacion contra droga ilegal.
Asegun con Delumpines, con Basser ya aresta na un operacion de compra busto mga alas 9:30 del Jueves denoche na Purok 2, Barangay Matibay, ciudad de Lamitan.
Asegun con Delumpines con el dos consumidores de droga ilegal ya cogi na acto ta usa droga na cuarto del casa que ta alquila si Basser. Nohay mas canila nombra si Delumpines.
Si Delumpines ya habla, ya confisca na cuarto de Basser mas o menos tres gramos de suspechao shabu que tiene el valor de P20,400, dos tarjetas de identificacion, P500 markao dinero de compra busto, y mga parafernales na usada de droga ilegal.
Asegun con Delumpines, con el tres arestao suspechao ya pone bajo’l custodia del policia na ciudad de Lamitan en preparacion para el plantada del asunto contra canila por violation del “Comprehensive Dangerous Drugs Act of 2002”. (B. Garcia)