Zamboanga: ‘NHA’ ya dale ayuda financial con mga victima de incendio

0
8
Photo courtesy of City Government of Zamboanga Facebook page

El “National Housing Authority (NHA)”, por medio del “Emergency Housing Assistance Program (EHAP)”, ya distribui P1.54 millon ayuda financial con mga victima de incendio aqui na ciudad de Zamboanga.

Asegun con el “City Social Welfare and Development Office (CSWDO)”, quien ya identifica con mga beneficiarios, tiene el total de beneficiario-familiares y cada uno familia ya recivi P10,000 ayuda financial.

Asegun con el CSWDO, el mga recipiente familiares amo mga residentes del 13 barrios afectao na incidente de quema del mga pasao meses.

El distribucion del ayuda financial ya hace na “covered court” del Barangay Labuan del Viernes.

Asegun con el CSWDO, el mga recipientes del ayuda financial amo mga residentes del mga siguiente barangay: Baliwasan, 44; Labuan, 41; Calarian, 20; Recodo, 17; Malagutay, 14; Canelar, cuatro; Kampung Islam, cuatro; Tumaga, tres; Pasonanca, dos; San Jose Gusu, dos; Cabatangan, uno; Capisan, uno; y, San Roque, uno.

El Alcalde John Dalipe, quien ya man hunto na distribucion del ayuda financial, ya expresa gratitud con el NHA, por medio del General Manager Joeben Tai, por el ayuda que ya dale con el mga victima del incendio.

Si Dalipe ya habla, el EHAP ta demonstra el esfuerzo colaborativo entre el gobierno local y nacional para suporta con aquellos quien necesita ayuda durante el tiempo de dificultad. (B. Garcia)

Leave a Reply