El mga autoridad ya aresta un individual de alto valor, o HVI, y confisca P1.7 millones valor de droga ilegal na un operacion contra droga na ciudad de Zamboanga, asegun con el policia del Jueves.
El policia ya identifica con el arestao suspechao como si Ebzar Esmon, 26 años el edad y residente de Barangay Sinunuc, ciudad de Zamboanga.
Asegun con el policia, con Esmon ya aresta na un operacion de compra busto maga alas 9:04 del Miercoles denoche na Paseo de Lemon, Barangay Baliwasan, ciudad de Zamboanga.
Asegun con el policia, con Esmon inmedietamente ya aresta cuando ya dale ele sinco termosellada transparente plastico sobresitos que ta contene suspechao shabu despues que ya recivi le el pago desde con el un secreta pulis.
El policia ya habla, ya confisca na posesion de Esmon 250 gramos de suspechao shabu que tiene el valor de P1.7 millones.
Puera del suspechao shabu, el policia ya habla, ya confisca tamen na posesion de Esmon tres balutan del soborno dinero que ya pone insima tres real P1,000 y un bolso bandolera.
Con el arestao suspechao ya pone bajo’l custodia del Zamboanga City Police Station 11 en preparacion para el plantada del caso contra conele. (B. Garcia)