El mga autoridad ya aresta na un operacion de aplicacion de ley un persona mas buscada por el crimen de frustrado matansa na provincia del Zamboanga del Norte, asegun con el policia del Jueves.
El Philippine National Police-Maritime Group (PNP-MG) ya identifica con el arestao persona mas buscada como si alias Marco, 19 años el edad.
Asegun con el PNP-MG, con Marco ya aresta na un operacion de aplicacion de ley por medio de servi’r orden de aresto del Martes na Barangay Uno, Katipunan, Zamboanga del Norte.
Asegun con el policia, si Marco tiene el pendiente orden de aresto por el crimen de frustrado matansa con recomendao piansa de P200,000 que ya dale el un corte na ciudad de Dipolog, Zamboanga del Norte, del Septiembre 9, 2024.
Despues del aresto del Marco, ya pone conele bajo el examinacion medical na Katipunan Regional Health Unit para asegura cay na buen salud el acusao.
Presentamente, detenido si Marco na estacion del policia na municipio de Katipuan para el disposicion y documentacion. (B. Garcia)