El mga autoridad ya confisca mas de P1 millon valor de smuggled cigarillo y ya aresta un persona na un operacion contra smuggling na ciudad de Zamboanga, asegun con el policia del Viernes.
El Zamboanga City Maritime Police Station (MARPSTA) nohay mas identifica con el arestao suspechao excepto de hablar un residente le del Barangay Tugbungan, ciudad de Zamboanga.
Asegun con el Zamboanga City MARPSTA, con el suspechao ya aresta mga alas 12:30 del Martes aga na canto’y aplaya del Barangay Arena Blanco, ciudad de Zamboanga. El policia ya confisca desde con el suspechao 20 cajon de smuggled cigarillo que tiene el valor de P1,146,000.
El mga personajes del Zamboanga City MARPSTA ya conduci el operacion contra smuggling despues que ya recivi sila un informacion sobre el llegada del mga contrabando desde con un miembro del Coastal Barangay Information Network.
Asegun con el policia, con el suspechao hay planta el caso por violacion del Ley de Republica Numero 10543 o mas conocido como el Ley de Advertencias Sanitarias Grapicas y Ley de Republica Numero 10863 tambien conocido como el Ley de Modernizacion y Arancel Aduanero.
Con el arestao suspechao y mga confiscao smuggled cigarillo ya lleva na Zamboanga City MARPSTA para el propio disposicion. (B. Garcia)