Total de 17 armas de fuego sin licencia el ya rendi el mga concierne ciudadanos con mga autoridad na provincia del Norte Cotabato y Bangsamoro Autonomous Region in Muslim Mindanao (BARMM), asegun con el militar del Viernes.
El 6th Infantry Division (6ID) ya habla con el 17 armas de fuego sin licencia ya rendi con el mga tropas del 40th Infantry Battalion (40IB) del Martes na Barangay Ladtingan, Pikit, Norte Cotabato.
El 6ID ya habla, el mga rendido armas de fuego sin licencia ta inclui cuatro rifles M-14, un calibre 5.56 milimetro Ultimax, dos calibre .45 pistolas, dos rifles Armalite, tres rifles Garand, tres lanzagranadas propulsadas por cohetes, un rifle carbin, un calibre.9-milimetro pistola, y bandoliers ta contene mga clip y bala.
Si Teniente Coronel Erwin Jay Dumaghan, el comandante del 40IB, formalmente ya presenta con el mga rendido armas de fuego con Brigadier General Ricky Bunayog, comandante del 602nd Infantry Brigade, na un simple ceremonia na cuartel del 40IB.
El 6ID ya habla, con el mga armas de fuego sin licencia ya rendi el mga concierne ciudadanos del mga municipios de Tugunan y Kapalawan na Area Geofrafica Especial del BARMM y municipio del Matalam, Norte Cotabato.
El 6ID ya habla, el rendida del mga armas de fuego es un resulta del intensificao campaña del mga tropas contra el proliferacion del mga pusil sin licencia.
Asegun con el 6ID, el rendida del mga pusil as parte tamen del resulta na implementacion del programa de manejo del Small Arms and Light Weapons (SALW) del gobierno con el objetivo eradica armas de fuego sin licencia na comunidades. (B. Garcia)