El mga autoridad ya confisca P10.2 millones valor de droga ilegal y ya aresta seis suspechao na separao operaciones contra droga na ciudad de Zamboanga y na provincia del Zamboanga del Sur.
Si Maharani Gadaoni-Tosoc, el director regional del Philippine Drug Enforcement Agency (PDEA), ya habla cay P6.8 millones del total valor ya confisca na ciudad de Zamboanga y el restante P3.4 milliones na ciudad de Pagadian, Zamboanga del Sur.
Si Gadaoni-Tosoc ya identifica con el mga suspechao ya aresta na ciudad de Zamboanga como canda Eldrian Alvarez, 20 años el edad; Jason Orquijo, 39; Alrakib Dasid, 36, y, Ellan Testado, 42.
Asegun con Gadaino-Tosoc, todo sila cuatro mga residentes del Barangay San Roque, ciudad de Zamboanga y clasificao como mga objetivos de alto valor, o high-value targets (HVTs).
Con el cuatro HVTs ya aresta el combinao operativas del PDEA y policia na un operacion de compra busto mga alas 12:40 del Jueves tarde na Barangay San Roque.
Asegun con Gadaoni-Tosoc, ya confisca na posesion del cuatro arestao HVTs un kilo de suspechao shabu que tiene el valor de P6.8 millones, 10 balutan de robar dinero (boodle money) que ya pone encima un real P1,000 como markao dinero, un celpon y dos motorciclos.
Si Gadaoni-Tosoc ya identifica con el mga suspechao ya aresta na ciudad de Pagadian, Zamboanga del Sur como canda Jessie Pada, 38, años el edad y un distribuidor de materiales educativos; y, si Sanny Boy Fontanilla, 29, un obrero. Ambos sila mga residentes de Maramag, Bukidnon. Con Pada y Fontanilla ya aresta na un operacion de compra busto mga alas 12:55 del Jueves tarde na parada del un centro comercial na Barangay San Pedro, ciudad de Pagadian, Zamboanga del Sur.
Ya confisca na posesion del dos suspechao 500 gramos de suspechao shabu enpaquetao na sinco plastico paquetes que tiene el valor de P3.4 millones, un balutan de robar dinero que ya pone encima un real P1,000 como markao dinero, un vehiculo, dos celpon, recivo de transaccion de banco, y otros pa mga parafernales de droga ilegal.
Asegun con Gadaoni-Tosoc el mga arestao suspechao hay enfrenta el caso por violacion del Ley Integral de Drogas Peligrosas de 2002. Asegun con Gadaoni-Tosoc, el dos operaciones contra droga ya conduci el mga operativas del PDEA con el suporta del policia na ciudad de Zamboanga y provincia del Zamboanga del Sur.
Si Gadaoni-Tosoc ya habla, hay continua sila intensifica el campaña contra droga ilega, llamando con el publico para reporta algun actividades suspechosos para ayuda elimina el proliferacion de sustancias peligrosas na Zamboanga Peninsula. (B. Garcia)