El Police Regional Office-Bangsamoro Autonomous Region (PRO-BAR) ya dona seis tractora con mga antes combatientes del Moro National Liberation Front (MNLF) na provincia del Lanao del Sur, asegun con el policia del Jueves.
Asegun con el PRO-BAR, el recipientes del donacion de tractora amo mga antes combatientes del MNLF estacionado na Campo Jabal Nur na Barangay Cabasaran, Madamba, Lanao del Sur.
Si Police Colonel Robert Daculan, el director del policia na Lanao del Sur, ya entrega del Miercoles tarde con el mga tractora con el recipiente combatientes del MNLF por parte de Police Brigadier General Romeo Macapaz, el director del PRO-BAR.
Asegun con el PRO-BAR, con el mga donao tractora ya recivi si Alexander Lagawa, el jefe del personajes del MNLF Bangsamoro Armed Forces y comandante general del comando nacional unificado.
El donacion del mga tractora ya inicia el PRO-BAR bajo’l liderato de Macapaz en ayuda con el busca lavida del mga antes combatientes del MNLF.
El firmada del escritura de donacion y aceptacion ya dale importancia con el ceremonia de entrego del mga tractora que ya man testigo el comunidad del MNLF y oficiales del policia.
El comunidad del MNLF ya rendi de ila gratitud con el PRO-BAR siendo amo el primera vez ya experiencia sila para recivi tal clase de donacion desde con el gobierno.
Ya acompania mga alto oficiales del policia na provincia del Lanao del Sur cuando ya entrega si Daculan con el donacion de tractora con el comunidad de MNLF na Barangay Cabasaran, Madamba. (B. Garcia)