El mga autoridad ya salva sinco potencial victimas de trafico humano na un operacion de aplicacion de ley na provincia del Tawi-Tawi, asegun con el policia del Martes. El Philippine National Police-Maritime Group (PNP-MG) nohay mas identifica con el mga salvao potencial victimas de trafico human puera lang de habla’r cay cuatro de ila mga hombres y el uno mujer menor de edad.
El PNP-MG ya habla, con el sinco potencial victimas ya salva del Viernes abordo na un barco de pasajero ta viaja desde ciudad de Zamboanga para na Bongao, Tawi-Tawi el mga personajes del 1st Special Operations Unit (SOU) Maritime Law Enforcement Special Team (MLEST), en colaboracion con el Tawi-Tawi Maritime Police Station y otros agencias asociadas.
El mga salvao potencial victimas de trafico humano, quien nohay mga propio documentos, tiene el intencion viaja para na Malaysia por medio del ilegal ruta.
Asegun con el policia, base na investigacion, tiene canila quien ya ofrece trabajo na Malaysia a pesar sin el necesario documentos legal. Asegun con el policia, con el mga salvao potencial victimas ya entrega na Ministerio de Servicios Sociales y Desarollo na in Bongao, donde ya recivi sila el adecuado ayuda y proteccion desde con el mga autoridades local.
Mientras tanto, el PNP-MG ta continua anima con el publico para esta vigilante y enmidietamente reporta na autoridades algun suspechoso actividad relatao na trafico humano.
El PNP-MG ya habla, el colectivo accion es esencial para previni trafico humano y garantiza el segurdidad del dominio maritima del pais. (B. Garcia)