Maga personajes del Community Environment and Natural Resources Office (CENRO) na municipio de Magsaysay, Zamboanga del Sur ya larga con sincuenta’y dos anak de Olive Ridley turtuga en akel provincia.
Asegun con Rosevirico Tan, el portavoz del Departmento de Media-ambiente y Recursos Naturales, con el maga anak de turtuga ya larga del domingo na palaya del Barangay Bulanit alla na municipio del Labangan, Zamboanga del Sur.
El International Union of Conservation of Nature (IUCN) ya lista con el Olive Ridley turtuga como un erensia vulnerable y en peligro de extincion.
Asegun con Tan cay el largada de anak de turtuga del domingo amo el tersera vez ya larga maga nuevo chucao turtuga na aplaya.
El primera vez amo del Hulyo seis donde noventa’y cuatro anak de Green Sea turtuga el ya larga na aplaya del Barangay Kauswagan na muncipio del Baliguian, Zamboanga del Norte.
El IUCN ya lista con el Green Sea turtuga en peligro ya de extincion cay menos ya el populacion de este porcausa de cujida, ta perde lugar donde pone huwebos y ilegal sacada de huwebos de turtuga.
El siguiente vez de largada de anak de turtuga amo alla na Barangay Lower Bayao, Tukuran, Zamboanga del Sur del Hulyo seis tambien.Durante akel tiempo, total de sesenta’y seis anak de Olive Ridley turtuga el ya larga na aplaya. (Bong Garcia)