El Philippine Drug Enforcement Agency (PDEA) ya encabesa con el destruccion del P331.2 millones valor de drogas peligrosas del Miercoles, marcando el mas grande destruccion que ya conduci na Zamboanga Peninsula.
Asegun con Maharani Gadaoni-Tosoc, el director del PDEA na Zamboanga Peninsula, el destruccion ya hace na Libertad Power and Energy Corporation (LPEC) na Aurora, Zamboanga del Sur, donde varias confiscao sustancias ilegales, incluido shabu y pasao medicinas, que ya incinera por medio del metodo de destruccion termal, y siguiendo con el estricto protocolos de medio ambiente y seguridad.
Asegun con Gadaoni-Tosoc, el ya destrosa drogas peligrosas compuesto de 48,689.6695 gramos de shabu, y 1,041 pedasos de pasao medicina. Este ta inclui el 21 y 16 kilos de shabu que ya confisca na dos separao operaciones contra droga del otro año na ciudad de Zamboanga.
Asegun con Gadaoni-Tosoc, el destruccion del mga drogas peligrosas ya hace de cumplimiento con el orden que ya dale el cortes del ciudad de Pagadian, Molave, Aurora, y ciudad de Zamboanga, y en coordinacion con el mga clave agencias de gobierno y partes interesadas.
Ya rendi tamen gratitud si Gadaoni-Tosoc con el LPEC, y todo oficiales y partes interesadas quien ya atende y ya hace posible con el actividad.
Con el destruccion del mga drogas peligrosas ya atende si Congresista Divina Grace Yu del primer distrito del provincia del Zamboanga del Sur como el juesped de honor.
El valor del drogas peligrosas que ya destrosa del Miercoles mas alto de P227.4 millones comparando con el que ya destrosa del otro año por medio de incineracion.
Del otro año, el PDEA ya encabesa con el destruccion de P103.8 millones valor de droga ilegal y pasao medicina del Octobre 18, 2024 na ciudad de Zamboanga. (B. Garcia)