Tres personas, incluido un oficial de barangay y guardia de carcel (jail guard), el ya aresta cuando ya bungca mga autoridad un “drug den” na un campaña contra droga ilegal na provincia del Zamboanga del Sur.
El oficina regional del Philippine Drug Enforcement Agency (PDEA) ya nombra con el mga arestao suspechao como canda Geson Saldivar, 29; Matty Aque, 31, consehal na Barangay Balamban, Mahayag, Zamboanga del Sur; y, si Felix Pangasian, Jr., 35, un guardia de carcel na municipio del Molave, Zamboanga del Sur.
Asegun con el PDEA, si Saldivar, de quien nombre incluido na “watchlist”, amo el ta mantene con el drug den, mientras si Aque y Pangasian mga clients e Saldivar.
Con el tres suspechao ya aresta na un campaña contra droga ilegal el mga agentes de PDEA con el suporta del policia na Purok 2, Barangay Salug Daku, Mahayag, Zamboanga del Sur del Lunes tarde.
“El operacion ya resulta tamen na bungcada del drug den, donde si Saldivar among el indentificao como el quien ta mantene con del drug den,” asegun con el PDEA.
Asegun con el PDEA, ya puede confisca 50 gramos de suspechao shabu que tiene el valor de P340,000, markao sen, un celpon, y mga galamiton na usada de droga ilegal.
Asegun con el PDEA, todo’l tres arestao suspechao positivo que ta usa droga ilegal, especificamente shabu, cuando ya pone canila bajo el examen de drogas.
Con el mga suspechao ay planta el asunto por violacion del Secciones 5, 6, 7, 11, 12, y 15, del Articulo Dos del Acto Republica 9165 conosido come el “Comprehensive Dangerous Drugs Act of 2002”.
El mga arestao suspechao temporalmente detenido na quartel del PDEA na Zamboanga del Sur. (B. Garcia, photo courtesy of PDEA-9)