Tres personas, incluido un “senior citizen” el ya iri na serca un hora incendio aqui na ciudad de Zamboanga, asegun con el “Zamboanga City Fire District (ZCFD)” del Miercoles.
Si Superintendent Christopher Morales, el ZCFD marshal, ya nombra con el mga irido victima como canda Gilbert Cababat,30 años el edad; Isnita Suari, 76; y si Carl Jayden Cababat.
Si Gilbert, Suari, y si Carl ya sufri quemadura de segundo grado na derecha pescueso, na pierna, y derecha hombre, respetivamente.
Asegun con Morales, el incendio ya principia na casa de Gilbert mga alas 11:34 del Martes denoche na Paseo de Ruste, Barangay San Roque, en este ciudad.
Asegun con Morales, el mga bombero ya puede controla con el fuego mga alas 12:10 del Miercoles aga y ya puede completamente apaga mga alas 12:23 del Miercoles aga.
Si Morales ya habla cay el incendio, que ya alcansa na primer alarma, ya rasa con el casa de Gilbert y el cantidad del destroso ya alcansa mas o menos P150,000.
Si Morales ya habla, ta precura pa sila determina si cosa el causa el incendio. (B. Garcia, photo courtesy of Zamboanga City Police Station 7)