El mga autoridad ya aresta dos personas, incluido un joven vendedor, y ya confisca mas de P6.8 millon valor de droga ilegal na campaña contra droga na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Sabado.
El PDEA-BARMM ya identifica con el arestao joven vendedor de droga ilegal como si Alimar Mama Matalicop, 19 años el edad, y residente del Barangay Kadingilan, Wao, Lanao del Sur.
El otro arestao suspechao identificao como si Usman Johani Rabbani, 41 años el edad, y residente del ciudad de Lamitan, Basilan.
Asegun con Gil Cesario Castro, el director del PDEA-BARMM, con Matalicop ya aresta na un operacion de compra busto del Jueves na Barangay Western, Wao, Lanao del Sur.
Asegun con Castro, ya confisca na posesion de Matalicop un kilo de suspechao shabu que tiene el valor de P6,800,000 y dinero de compra busto.
Asegun con Castro, con Matalicop ya aresta el mga agentes del PDEA-BARMM con el suporta del 55th Infantry Battalion.
Si Castro ya habla, con Rabbani ya aresta na otro operacion de compra busto del Viernes na Sitio Talisay, Barangay Kulaybato, ciudad de Lamitan, Basilan.
Si Castro ya habla, ya confisca na posesion de Rabbani sinco gramos de suspechao shabu enpaquetao na sinco termosellada transparente sobrecitos plastico que tiene el valor de P34,000, dinero de compra busto, tarjetas de identificacion, y mga parafernales de droga ilegal.
Con Rabbani ya aresta el mga agentes del PDEA-BARMM con el suporta del policia de ciudad de Lamitan, personajes del 1st Provincial Mobile Force Company y 1403rd Regional Mobile Force Company y 18th Infantry Battalion.
Asegun con Castro, con el mga arestao suspechao hay planta caso por violation del Ley integral de drogas peligrosas de 2002. (B. Garcia)