El mga personajes del Philippine Coast Guard (PCG) ya salva con 13 tripulantes de un varco de cargamento na mar del provincia de Zamboanga del Norte.
Asegun con el PCG, con el mga tripulantes ya salva del Lunes serca na isla de Bayangan Municipio de Labason, Zamboanga del Norte.
Nohay mas nombra el PCG con el mga salvao personas puera de hablar mga tripulantes sila del M/V Star Sabang.
Base na investigacion, el M/V Star Sabang ta carga 170 tonelada de cemento estaba na Cebu para lleva na Zamboanga cuando ya inclina el varco por causa de grande marijada que a causa el mal tiempo.
El mga personajes del Coast Guard Sub-Station (CGSS)-Salug ya enderesa para na municipio de Labason y ya coordina con el Municipal Disaster Risk Reduction Management Office para conduci operacion de rescate despues que ya recivi sila llamada de ausillo desde con Zamcebar Cutaran, el capitan del M/V Star Sabang.
Asegun con el PCG, con el 13 salvao tripulantes librao ya lleva para na isla de Bayangan na municipio de Labason.
(B. Garcia, photo courtesy of Philippine Coast Guard)
