El Secretaria Maria Antonia Yulo-Loyzaga del Departamento del Medio Ambientes y Recursos Naturales o el DENR ya apela con todos partes interesadas para ayuda preserva con el bosque antiguo na Pasonanca Natural Park (PaNP) aqui na ciudad de Zamboanga.
Si Yulo-Loyzaga ya ase el apelo despues que ya encabesa ele el inaguracion del Lunes con el momumento del Pasonanca Natural Park-Asean Heritage Park na Paseo de Castro, Sitio Canucutan, Barangay Pasonanca en este ciudad.
El inaguracion del monumento ta marka el designacion del PaNP como el aka-52 Asean Heritage Park, el aka-10 na Pilipinas, y el primero na Zamboanga Peninsula.
El desenio del monumento ta dale mira el estractura de piramide, semehante con el piramide tropico, que ta servi como un representacion visual del gran divercidad natural del parke.
Tiene tamen icono del aguila que ta representa con el excelente aguila del Pilipinas. Notablemente, el techo a simboliza el esfuerzos de mga partes interesadas para guardia y conserva con el parke. El desenio del techo ta inspira con mga sitios principals na ciudad de Zamboanga, llebando un sentido de identificacion local con estilo.
Asegun con Yulo-Loyzafa, el un bosque antiguo na PaNP tiene mucho carbon que puede servi como un armas na peleya contra el cambio del clima.
Asgun con Yulo-Loyzaga, el bosque antiguo puede tamen servi de armas para controla avenida y servi como un sistema de irigacion agricultural y para otros nececidades.
Ya nota si Yulo-Loyzaga cay el PaNP es un natural riqueza que ta servi como el fuente principal de limpio, fresco y potable agua para del serca un millon residentes del ciudad de Zamboanga. (B. Garcia)