Mokabat sa 193 ka mga benepisyaryo gikan sa lungsod nan Dapa, General Luna ug Pacifico, San Isidro an makadawat nan cash assistance sa kantidad P3, 700 pesos gikan sa pundo ni House Speaker Martin Romualdez ug sa Tingog Partylist Congresswoman Yedda Romualdez iban sa paningkamot ni Congressman Bingo Matugas didto sa kaulohan.
An Department of Labor and Employment amo an nag plastar sa pag hatag nan cash assistance ngadto na sa 193 ka mga benepisyaryo nga diin sa lungsod nan Dapa jaoy 70 ka mga benepisyaryo hampan sa General Luna jaoy 74 ug sa Pacifico, San Isidro jaoy 49 sa kinatibuk.ang 193 niini.
Sa mensahe nga gipadangat ni Congressman Bingo Matugas nga matud pa sija nagpasalamat sa mga katawhan nga misuporta sa ija mga programa ug gamiton an kwarta aron maka tabang sa pang adlaw-adlaw nga panginabuhi.
Ni hatag isab nan mensahe si Vice Mayor Gerry Matugas Abejo ngadto na kay Congressman Bingo Matugas agig pagapasalamat sa Congressman sa gipahigayon nga Tupad Payout sa Brgy. Poblacion 1 lungsod nan Dapa.
Dako isab an kalipay ni Kapitan Cervantes sa Congressman human nakatagamtan an ija mga barangayanon nan cash assistance.
Gi.anunsyo ni Congressman Bingo Matugas nga jaoy ipahigayon nga International Surfing Cup QS 5000 2024 kuman umaabot Oktubre 25, 2024.
Jaon sa Tupad Payout an presensiya sa mga nagkadaiyang personahe sama nila ni Senior BM Constantino ‘Bully’ Navarro, BM Julecs Sunico, SB Aiken Andanar, Kanhi BM Sim Castrence ug an asawa ni Congressman Bingo Matugas nga si Madam Ethel Matugas. (Mark James Lisondra)