El jefe del Oficina de Permisos y Licencias Comerciales (OPLC) Benjie Barredo ya apela con mga oficiales del 98 barrios del ciudad para ayuda canila bisia con mga estaciones de gasolina na de ila respetivo comunidades.
Si Barredo ya hace el llamada despues que ya recivi informacion su oficina cay tiene mga estaciones de gasolina, incluido mga estaciones de servicio móviles, el ta prolifera ahora na mga barangay del ciudad.
El estacion de servicio moviles tiene incorporado tanke de gasolina y bomba. Ta puede usa con el equipo para pone gasolina na mga vehiculos o contenedores na diferente locaciones.
Asegun con Barredo, necesita sila el ayuda del mga oficiales del barangay na bisiada del mga estaciones de gasolina na de ila respetivo comunidad para asegura legal el negocio.
“Necesita informa sila canamon si tiene estacion de gasolina ta opera na de ila lugar sin el necesario permiso para puede came inmedietamente hace el propio accion,” ya habla si Barredo.
El oficina de Barredo recientemente ya dale orden de cese y desistimiento con 18 estaciones de gasolina que ta opera sin permiso de negocio.
Sl Barredo ya habla 16 del 18 el ya saca ya permiso de negocio desde su oficina y el restante dos tiene pa que somete de ila mga requerimientos.
Ya adverti si Barredo cay hay ordena sila serra con mga estacion de gasolina de quein dueño ta continua opera sin permiso de negocio. (B. Garcia)