El Oficina de Salud del Ciudad ya comete continua el proactivo esfuerzo contra dengue para significante ase abaja con el numero del caso de dengue aqui na ciudad.
Asegun con Dr. Dulce Amor Miravite, el jefe del Oficina de Salud del Ciudad, el de ila mga inspector sanitario y personajes de salud, regularmente ta conduci proactivo esfuerzos contra dengue hinde lang durante el tiempo si alto el numero del caso del mencionao enfermedad.
Base na presente informacion del mga oficiales de salud local, el ciudad ya registra 142 caso de dengue para el periodo amediante del Enero 1 hasta Febrero 10.
El reportao admision de dengue es bajo de 44 por ciento comparando con el 225 mga casa que ya documenta para el semehante tiempo del 2023.
El Barangay de Putik ya registra mayoria del mga numero del caso de dengue de nueve, y apiki lang ta sigi el mga barrios del Calarian, Labuan, Sta. Maria, Tetuan, y Tumaga con siete admision cada uno.
Mientras tanto, el barangay de Quiniput el ya registra de todo alto numero de atake con 7.23 por ciento cada 10,000 populacion.
Maskin ta abaja el numero, el Oficina de Salud del Ciudad ta esta alerto na chequeada del caso de dengue y ta implementa mejoras de preventivo, principalmente el constante campaña de informacion y advocacias. (B. Garcia, photo courtesy of City Health Office)